Бүгін SDU University-де білімгерлерге арналған Спорт және мәдениет орталығының ашылу салтанатты рәсімі өтті. Салтанатты жиынға Алматы облысы мен Қарасай ауданы әкімшілігі, 200-ден аса мектеп директорлары және арнайы шақырылған  қонақтар қатысты. Іс-шараны Алматы облысы әкімі Марат Сұлтанғазиев құттықтау сөзімен ашып, қонақтармен бірге жаңа ғимаратқа экскурсия жасады.

Кездесу барысы облыстан келген ұстаздарға арналған SDU ректоры Әлімжан Игенбаевтың «Ұстанымы биік ұстаз тұлғасы» атты лекциясымен жалғасын тапты.

Университет аумағында бой көтерген 4370 шаршы метрлік Спорт және мәдениет орталығында білімгерлердің салауатты өмір салтын ұстанып, шығармашылықпен айналысуына барлық жағдай жасалған. Жаңа ғимарат ішінде 1400 шаршы метрлік спорт зал мен әр түрлі іс-шараларға арналған алаңдар, 1700 шаршы метрлік акт залы, ұлдар мен қыздарға арналған бөлек фитнес залдар, киім ауыстыру мен жуынуға арналған жеке бөлмелері бар. Сондай-ақ заманауи ауа айналым жүйесімен жабдықталған ғимаратта асхана, лифт қызметі, көлік тұрағы бар.

SDU Университеті өз білімгерлерінің академиялық білім алуынан бөлек, шығармашылық іс-шараларға қатысып, жан-жақты дамуы үшін қызмет етуде.