15 мамыр күні SDU University-де желілік және ақпараттық қауіпсіздік саласындағы әлемдік көшбасшылардың бірі — Fortinet компаниясының зертханасы салтанатты түрде ашылды. Ашылу рәсімінде лентаны Академиялық істер жөніндегі проректор Андрей Богданчиков пен Fortinet компаниясының Қазақстандағы өкілі Елжан Насипов қиды.

Зертхананың ашылуы Fortinet компаниясының Қазақстандағы ресми дистрибьюторлары — Abris Distribution және Marvel Kazakhstan компанияларының қолдауының арқасында мүмкін болды. Олар заманауи жабдықтарды ұсынды.

Зертхана келесі Fortinet құрылғыларымен жабдықталған: FortiGate 30G, FortiWiFi 40F, FortiSwitch 248D, FortiAP 231F.
Сондай-ақ зертханалық сабақтар мен арнайы курстар өткізу үшін Fortinet бұлттық полигондарына қолжетімділік берілген.

Fortinet Academy-мен серіктестік SDU University студенттеріне кең ауқымды білім алу мүмкіндіктерін ұсынады:

• Fortinet Training Institute ресми платформасында оқу

• Зертханалық тапсырмалар мен бұлттық киберполигондарға қолжетімділік

• Fortinet кәсіби сертификаттаудан өтуге арналған ваучерлер

Зертхана ашылуында Fortinet, Abris Distribution және Marvel Kazakhstan инженерлері, факультет оқытушылары мен студенттері, сондай-ақ университет әкімшілігінің өкілдері қатысты.

Fortinet зертханасының ашылуы — ақпараттық қауіпсіздік саласындағы әлемдік стандарттарға сай білікті мамандарды даярлаудағы маңызды қадам. SDU University жетекші технологиялық компаниялармен серіктестікті жалғастыра отырып, студенттерге практикалық білім алуға бірегей мүмкіндіктер ұсынып келеді.