2024 жыл SDU University үшін жеңіс пен жетістікке толы жыл болды. Осы орайда, өткенге көз жүгіртіп, 2024 жылда орын алған ірі оқиғаларға тоқталып өтейік:

Біздегі 15 мамандық “Атамекен” ҰҚП рейтингісінде ТОП-10 тізіміне енді. Университеттер 19 критерий бойынша бағаланды, олардың негізгілері: жұмыспен қамту деңгейі, орташа жалақы, жас маманның жұмысқа орналасу жылдамдығы, білім беру бағдарламасының аккредитациясы және мамандықтың өзектілігі. Рейтинг нәтижесі бойынша SDU университетінің 15 мамандығы республика бойынша үздік ондыққа енді.

Freedom Shapagat SDU университетінің студенттері үшін жаңа оқу ғимаратын салды. Жыл басында SDU университетінде Freedom Holding Corp компаниясының қолдауымен жаңа ғимараттың іргетасын қалау рәсімі өтті. Жалпы ауданы 5600 шаршы метрден асатын заманауи оқу ғимаратының құрылысы жақында өз мәресіне жетеді. Мұнда студенттер жасанды интеллект негізіндегі технологияларды пайдалану әдістерін үйренеді.

QS Asia University Rankings 2025. SDU University беделді QS Asia University Rankings 2025 рейтингінде айтарлықтай жоғары нәтиже көрсетті. Өткен жылы университетіміз Азия бойынша 551-600 орындар арасында болса, биыл 461-470 орындарға дейін көтерілді. Сонымен қатар, SDU Азияның ең үздік 500 университеті, Орталық Азияның ең үздік 30 университетінің қатарына кіріп, аймақтағы жетекші орнын және білім мен ғылым саласындағы зор үлесін растап отыр.

SDU University жылдың ең ауқымды жәрмеңкесін өткізді. Ауқымы рекордтық көрсеткішке жеткен GRAND жәрмеңкесіне 7 мыңға жуық адам қатысты. Шара барысында аукцион ұйымдастырылып, университет меншігіндегі құнды бұйымдар қымбат бағаға саудаланды. Шара қорытындысы бойынша жәрмеңкеден 9 429 174 теңге жиналды. Бұл қаражат су тасқынынан зардап шеккен аймаққа көмек көрсету мақсатында «Шұғыла» Қоғамдық Қорына табысталды.

SDU University зерттеуші ғалымдары 2024-2026 жылдарға арналған ғылыми жобаларға грант ұтты. «SDU University» зерттеушілері 2024-2026 жылдарға арналған ғылыми және ғылыми-техникалық жобаларды гранттық қаржыландыру конкурсында және «Жас ғалым» жобасы бойынша жеңіске жетті. Бұл маңызды жетістік зерттеу жұмысының жоғары деңгейін және ғылыми қоғамдастық үшін жобаның маңыздылығын көрсетеді.

130 баллдан жоғары жинаған 246 талапкер SDU студенті атанып отыр. Мемлекеттік грант конкурсының нәтижесі бойынша SDU университетіне 1401 талапкер грантқа түсті. Жаңа оқу жылының басты ерекшелігі – білімімен мыңды жыққан кіл мықтылардың көпшілігі SDU University-ді таңдаған. Айта кетсек, соңғы 3 жылда болмаған рекордтық нәтижеге қол жеткізіп, 140 балл жинаған екі талапкер де бізді таңдады. Сондай-ақ 139 балл жинаған 3 түлек SDU студенті атанды. Статистикаға көз жүгіртсек, республика бойынша 138 балл жинаған – 6 талапкердің 5-еуі, 137 балл жинаған – 20 талапкердің 13-і SDU университетін таңдады.

Қытайдың 7 университетімен ынтымақтастық орнатылды. SDU университетінің делегациясы “Аспан асты еліне” сапар шегіп, Қытайдың үздік оқу орындарымен танысып қайтты. Нәтижесінде, беделді 7 университетпен әріптестік қарым-қатынас орнатылды. Бұл ынтымақтастық білім беру және ғылыми зерттеулер саласында халықаралық тәжірибе алмасуға, жаңа технологиялар мен инновацияларды меңгеруге мүмкіндік береді.

SDU University білім ордасында ICBCB конференция өтті. SDU University білім ордасында Мәдениетаралық байланыс бойынша халықаралық конференция өтті. Ауқымды шараға Ұлыбритания, Жапония, АҚШ, Канада елдерінің беделді ғалымдары, отандық зерттеуші-ғалымдар және еліміздің әр аймағынан келген оқытушы ұстаздар жиналды.

SDU университетінде БҰҰ-ның Тұрақты даму мақсаттарына арналған стендтің салтанатты ашылуы өтті. Қыркүйек айында SDU университетінде Тұрақты Даму Апталығы болып өтті. Апталық аясында ауқымды шаралар жүзеге асты әрі «SDGs at SDU» стендінің ашылу салтанаты ұйымдастырылды.

SDU өнертапқыш студенттері көліктің жаңа моделін жасады. Биыл инженерлік бағытта білім алып жатқан студенттер университет негізінде екінші көліктерін жасап шығарды. «N1 Racing SDU» көлігін жасауға жалпы 9 ай уақыт жұмсалды: 6 ай жоба әзірленіп, соңғы 3 айда құрастырылды. «Кабирхан» деп аталған жаңа көлік алдыңғысына қарағанда қуаты жоғары, технологиясы күрделірек және қауіпсіздігі жақсартылған. Автокөлік сағатына 80 шақырым жылдамдыққа жете алады және апаттық жағдайларда моторды өшіру мүмкіндігімен жабдықталған. Студенттер инженерлік 3D модельдеу үлгісін 100% дәлдікпен жүзеге асырды.