SDU University делегациясы Вьетнам Социалистік Республикасына жасаған ресми сапары аясында Ханой ұлттық университетіне қарасты Табиғи ғылымдар университетінде Қазақстан Республикасының Ұлттық ғылым академиясы өкілдерімен бірлескен ресми кездесуге қатысты.

SDU University делегациясын университет ректоры, профессор, доктор Әлімжан Игенбаев бастап барды. Кездесуге Табиғи ғылымдар университетінің ректоры, профессор, доктор Ле Тхань Сон, сондай-ақ Қазақстан Республикасының Ұлттық ғылым академиясының вице-президенті, профессор, доктор Аскар Жұмаділдаев қатысты.

Кездесу барысында тараптар жоғары білім және ғылыми-зерттеу салаларындағы халықаралық ынтымақтастықты дамыту мәселелерін талқылады. Атап айтқанда, оқытушылар мен студенттер алмасу, бакалавриат, магистратура және докторантура деңгейлерінде бірлескен білім беру және ғылыми бағдарламаларды іске асыру, сондай-ақ ынтымақтастық туралы меморандумға (MOU) қол қою перспективалары қарастырылды.

Табиғи ғылымдар университеті тарапынан іргелі ғылымдар саласындағы білім беру дәстүрлері, дарынды оқушыларды даярлау жүйесі және халықаралық олимпиадалардағы жоғары нәтижелері таныстырылды. Өз кезегінде SDU University халықаралық аккредитациядан өткен (FIBAA, ASIIN, ACQUIN) бағдарламалары, ағылшын тілінде жүзеге асырылатын білім беру моделі және халықаралық серіктестік тәжірибесімен бөлісті.

Қазақстан Республикасының Ұлттық ғылым академиясының вице-президенті профессор Аскар Жұмаділдаев математика, физика, компьютерлік ғылымдар бағыттарында бірлескен ғылыми бастамалар мен халықаралық жобаларды дамытуға үлкен әлеует бар екенін атап өтті.

Кездесу қорытындысы бойынша тараптар жаратылыстану ғылымдары, математика, информатика және кванттық ғылымдар салаларында бірлескен жұмыстарды кезең-кезеңімен іске асыруға және оқытушылар мен студенттер алмасуды ынтымақтастықтың басым бағыты ретінде дамытуға уағдаласты.