Инклюзивті білім беру тек ерекше қажеттіліктері бар жандарға жағдай жасау ғана емес, сонымен қатар қоғамның адамгершілік деңгейінің, өркениетке бет бұруының көрсеткіші. Әрбір адам — қоғамның толыққанды мүшесі. Оған сапалы білім алуға, өз қабілетін жүзеге асыруға және армандарына қол жеткізуге тең мүмкіндік берілуі тиіс.

SDU University — ерекше қажеттілігі бар жастарға сапалы білім алуға мүмкіндік беретін еліміздегі алғашқы жоғары оқу орындарының бірі. Инклюзивті орта қалыптастыру бағытында жүзеге асып жатқан нақты қадамдар бүгінде өз жемісін беріп келеді.

Жақында ғана “Білім-Инновация” Халықаралық қоры ұйымдастырған дәстүрлі Q Talks республикалық жобасында SDU University-дің Педагогика және гуманитарлық ғылымдар факультетінің 1 курс студенті, Тарих мамандығы бойынша білім алып жатқан Сапашов Саят Саматұлы көпшілікті тәнті етті. Көру қабілеті шектеулі болса да, Саят өзінің білімге деген ынтасымен, қоғамдағы өзекті мәселелерге деген азаматтық көзқарасымен өзгелерден оқ бойы алда болып, арнайы дипломмен марапатталды.

Саяттың арманы — тарих пәнінің мұғалімі атанып, болашақта көру қабілеті шектеулі балаларға арналған арнайы интернаттарда сабақ беру. Өз кезегінде SDU университеті әрбір ерекше студентінің қолтығынан демеп, өмірден өз жолын тауып кетуіне септігін тигізбек.