SDU University университетінің Әлеуметтік ғылымдар, бизнес және құқық мектебінде “Қолданбалы психология” білім беру бағдарламасы аясында маңызды екі іс-шара өтті: “Қолданбалы психология” зертханасының ресми ашылуы және 2026 жылғы Ақылдасу алқасының отырысы.

Жаңа зертхана полимодальді терапия бағыттарына арналған заманауи құрал-жабдықтармен қамтылған. Мұнда арт-терапия, экзистенциялық терапия, тән терапиясы, отбасылық және ойын терапиясы, сондай-ақ когнитивті-мінез-құлықтық терапия бағыттары бойынша практикалық жұмыстар жүргізуге мүмкіндік бар.

Зертхана нейропсихология, психодиагностика, жас ерекшелік психологиясы, деректерді талдау мен интерпретациялау, мәдени психология пәндері бойынша студенттердің қолданбалы дағдыларын қалыптастыруға арналған.

Алайда зертхананың басты құндылығы – тек құрал-жабдықтар емес, оны жандандыратын кәсіби мамандар. Ашылу салтанатына психологияның академиялық және практикалық салаларында еңбек етіп жүрген профессорлар, оқытушылар мен практик-мамандар қатысып, жаңа бастамаға қолдау көрсетті. Бұл зертхана – болашақ психологтардың кәсіби қалыптасуына арналған жаңа кеңістік, теория мен практиканы тиімді ұштастыратын маңызды оқу-тәжірибелік алаң.

Зертхана ашылуы аясында Ольга Бисенқызы Тапалова, психология ғылымдарының докторы, профессор, «Клиникалық және әлеуметтік психология» PhD бағдарламасының ғылыми жетекшісі (Abai University), «ҚазҰПУ хабаршысы. Психология» журналының бас редакторы, “Психологическая лаборатория XXI века: от Вундта к психотехнологиям будущего” атты әлемдік және қазақстандық психология ғылымындағы зертханалардың тарихы, рөлі, қазіргі жағдайы мен болашағы жайлы студенттерге арналған семинарын өткізді.

Осы күні SDU University-де “Қолданбалы психология” білім беру бағдарламасының 2026 жылғы Ақылдасу алқасының отырысы да өтті. Кездесу барысында бағдарламаның қазіргі жағдайы, мазмұны, оқу жоспарының құрылымы, зертхананың даму мүмкіндіктері, практикалық даярлықты күшейту, кәсіби стандарттарға сәйкестік және стратегиялық даму бағыттары талқыланды.

Отырыстың ерекше қыры – студенттердің белсенді қатысуы болды. Олар оқу бағдарламасының мазмұны мен практикалық компонентін жетілдіруге қатысты өз ұсыныстарын ашық білдірді. Талқылау академиялық орта мен практикалық сала өкілдері, әртүрлі психотерапиялық бағыт мамандары және жоғары оқу орындарының профессор-оқытушылар құрамымен кәсіби диалог форматында өтті.

Бұл кездесу SDU University-де ашықтыққа, теңдікке және серіктестікке ұмтылатын мәдениеттің нақты көрінісі болды.

2026 жылғы Ақылдасу алқасының мүшелері

1. Ольга Бисенқызы Тапалова – Психология ғылымдарының докторы, профессор, «Клиникалық және әлеуметтік психология» PhD бағдарламасының ғылыми жетекшісі (Abai University), «ҚазҰПУ хабаршысы. Психология» журналының бас редакторы.
2. Надежда Бисенқызы Жиенбаева – Психология ғылымдарының докторы, профессор (Abai University), Диссертациялық кеңес мүшесі (Тұран университеті).
3. Сергей Владимирович Скляр – Сергей Скляр орталығының директоры, медицина ғылымдарының кандидаты, Жоғары санатты дәрігер, психиатр, психотерапевт, «Жалпы және қолданбалы психология» кафедрасының аға оқытушысы (Al-Farabi University), Еуразиялық когнитивті-мінез-құлықтық психотерапия қауымдастығы (ЕАКПП) вице-президенті, Жалпыресейлік кәсіби психотерапиялық лига (ОППЛ) сертификаттаған халықаралық деңгейдегі Балинт топтарының жетекшісі.
4. Валентина Калбаевна Жумадилова – Психотерапия институтының директоры, Халықаралық деңгейдегі Балинт топтарының сертификатталған жетекшісі, Сергей Скляр орталығының бірлескен құрылтайшысы, психолог.
5. Манзура Кеңесбекқызы Жолдасова – PhD, «Жалпы және қолданбалы психология» кафедрасының доценті (Al-Farabi University), Ми институтының ғылыми қызметкері, Республикалық оқу-әдістемелік кеңес мүшесі.
6. Жанат Амантайқызы Біржанова – Психология ғылымдарының кандидаты, Практикалық психолог, экзистенциялық терапевт.
7. Асель Мубаракқызы Айтімбетова – практик-психолог (Astana IT University, Мәдени және экзистенциялық психология орталығы)
8. Диана Ордағұлова – PhD кандидат, «Жалпы және қолданбалы психология» кафедрасының аға оқытушысы (Тұран университеті, Abai University).
9. Ақгүл Құсайынқызы – (Qalam School мектебі, Мәдени және экзистенциялық психология орталығы).

Бұл екі іс-шара SDU University-де “Қолданбалы психология” білім беру бағдарламасының сапалы дамуына, теория мен практиканы ұштастыруға және болашақ мамандарды кәсіби ортаға бейімдеуге бағытталған маңызды қадамдар ретінде бағаланды.