22-29 мамыр аралығында СДУ Құқық және Әлеуметтік ғылымдар факультетінің өкілдері: факультет деканы Саудбаев М., Құқықтану кафедрасының меңгерушісі Копбаева А., Әлеуметтік ғылымдар кафедрасының меңгерушісі Нуридденова А. және Құқықтану кафедрасының PhD, ассистент профессоры Естемиров М. іс-сапармен Германия, Польша және Эстония елдеріне барды.

Іссапардың басты мақсаты – Еуропаның бірқатар университеттерімен келіссөз жүргізу. Соның ішінде Германияның Гумбольдт және Висмар, Польшаның Адам Мицкевич және Варшава, Эстонияның Тарту университеті мен Германияның Deutsche Welle академиясымен академиялық ынтамақтастықтың мүмкіндіктері талқыланды. Атап айтқанда, білімгерлер мен профессор-оқытушылық құрамының академиялық алмасуы, бірлескен білім беру бағдарламаларын дамыту, бірлескен зерттеулер жасау, жазғы мектептер және PhD кандидаттарының шетелдік жетекшілігі және т.б. тақырыптар аясында келіссөздер жүргізілді.

Сапар нәтижесінде, СДУ Құқық және Әлеуметтік ғылымдар факультеті мен Варшава университетінің Саясаттану және халықаралық зерттеулер факультеті арасында ынтымақтастық туралы меморандумға қол қойылды. Сонымен бірге, Висмар университетімен магистратура деңгейі бойынша қос диплом бағдарламасын ашу, оқытушы және бакалавриат білімгерлеріне арналған жазғы мектептер ұйымдастыру туралы келісім жасалды. Тарту және Адам Мицкевич Университетімен болашақта жасалатын жұмыстар талқыланды.