7 қарашада SDU University-ге Ислам әлемінің білім, ғылым және мәдениет ұйымының (ICESCO) бас директоры Dr. Salim M. AlMalik бастаған делегация келді. Делегация құрамында ICESCO-ның ғылым және қоршаған орта секторының басшысы Куаныш Ергалиев те болды.

SDU University ректоры Арман Жумажанов және университет басшылығының өкілдерімен өткен кездесуде тараптар академиялық ынтымақтастықтың перспективалық бағыттарын талқылады. Бірлескен зерттеулерге, студенттердің практикалық дағдыларын дамытуға және жаңа білім беру бастамаларын іске асыруға ерекше назар аударылды.

ICESCO өкілдері «Халықаралық құқық» және «Халықаралық бизнес» білім беру бағдарламаларының студенттерімен де кездесті. ICESCO-ның ресми сайтында хабарланғандай, ұйым аталған бағдарламалардың студенттеріне ICESCO-да тағылымдамадан толық немесе ішінара өту мүмкіндігін ұсынуға дайын екенін білдірді.

Ынтымақтастықтың перспективалық бағыттары ретінде халықаралық бизнес саласындағы бірлескен зерттеулер және студенттердің практикалық құзыреттерін дамытуға арналған жобалар қарастырылды.

Сонымен қатар, тараптар 2027 жылдың жазында бірлескен жастар воркшопын өткізу мүмкіндігін алдын ала талқылады. Іс-шара тәжірибе алмасуға, практикалық дағдыларды дамытуға және жас мамандар мен зерттеушілердің өзара байланысын нығайтуға арналған алаң болады деп жоспарлануда.

Кездесу қорытындысында ICESCO бас директоры SDU University ректоры Арман Жумажановты ұйымның Рабат қаласындағы штаб-пәтеріне шақырды. Бұл сапар келіссөздерді жалғастырып, алғашқы бірлескен жобаларды айқындауға мүмкіндік береді.

Кездесу SDU University-дің халықаралық байланыстарын нығайтуға және студенттердің академиялық әрі кәсіби мүмкіндіктерін кеңейтуге бағытталған маңызды қадам болды.

SDU University өкілдері білім беру саласының өзекті үрдістері мен даму перспективаларына арналған Profit Education Day 2026 іс-шарасына қатысты.

Университет делегациясының құрамында стратегиялық даму және цифрландыру жөніндегі проректор Андрей Богданчиков, Цифрландыру орталығының директоры Ибрагим Тунжер және орталықтың бас маманы Арайлым Мардемханова болды.

Іс-шара аясында Андрей Богданчиков панельдік сессияда спикер ретінде сөз сөйледі. Қатысушылар сараптамалық пікірлері мен тәжірибелерін ортаға салып, білім беруді цифрлық трансформациялаудың заманауи сын-қатерлерін, мүмкіндіктері мен даму перспективаларын талқылады.

SDU University-дің цифрлық трансформация саласындағы практикалық тәжірибесін Арайлым Мардемханова таныстырды. Ол өз баяндамасында университеттің цифрлық экожүйесі, цифрландыру стратегиясы, ақпараттық жүйелерді интеграциялау, ішкі үдерістерді автоматтандыру, цифрлық сервистерді дамыту және жасанды интеллект технологияларын енгізу туралы баяндады.

Profit Education Day 2026 іс-шарасына қатысу SDU University-дің тәжірибесін кәсіби қауымдастыққа таныстыруға, үздік практикалармен алмасуға және цифрлық білім беруді дамытудың алдағы бағыттарын талқылауға мүмкіндік берді.

SDU University-де болашақ талапкерлер мен олардың ата-аналарына арналған Open Day 2026 – Ашық есік күні өтті. Іс-шараға 927 адам тіркеліп, университетке 450-ден астам оқушы мен ата-ана келді.

Қонақтар SDU University-дің білім беру бағдарламалары, оқуға қабылдау талаптары, ағылшын тілін меңгеру мүмкіндіктері және студенттік өмірімен танысты. Университет өкілдері талапкерлерге мамандық таңдау, оқуға түсу тәртібі және студенттерге ұсынылатын мүмкіндіктер туралы ақпарат берді.

Кездесу барысында ҰБТ-дан 140 балл жинаған SDU University студенттері Али Лоян мен Альфия Балхан өз тәжірибелерімен бөлісіп, талапкерлерге дайындық пен университет таңдау жөнінде кеңес берді. Сонымен қатар, қатысушылар мектептердің таныстырылымдарына қатысып, өздерін қызықтырған сұрақтарға жауап алды.

Іс-шара «Толқын» оркестрі, Orlean және Bakers би топтарының өнерімен толықты. Open Day 2026 талапкерлер мен ата-аналарға университет ортасын жақыннан танып, болашақ білім бағытын айқындауға мүмкіндік берді.

SDU University QS World University Rankings: Asia 2027 рейтингісінің нәтижелері бойынша Азияның үздік университеттері қатарына енді. QS Quacquarelli Symonds халықаралық сараптамалық ұйымының деректеріне сәйкес, университет Азия бойынша 691-орынды бөлісті (#=691). Сонымен қатар, Қазақстан жоғары оқу орындары арасында 25-орынға, ал Орталық Азия университеттері арасында 44-орынға ие болды.

Биылғы рейтинг — оның тарихындағы ең ауқымды басылым. Оған 26 жоғары білім беру жүйесінен 1 700-ден астам университет, оның ішінде Қазақстанның 51 жоғары оқу орны енді.

Бұл нәтиже SDU University-дің Азияның жоғары білім кеңістігіндегі орнын айқындап, университеттің ұлттық және өңірлік деңгейдегі көрсеткіштерін көрсетеді.

SDU University дарынды жастарды қолдау және олардың сапалы жоғары білім алуына мүмкіндік жасау мақсатында FAIO 2026 халықаралық жасанды интеллект олимпиадасының жеңімпаздарына бакалавриат бағдарламалары бойынша төрт жылдық білім гранттарын ұсынады.

Университеттің 30 жылдық мерейтойына орай білім алуға ұмтылған талантты жастарға арналған 30 грант пен жеңілдік қарастырылған. Бакалавриат бағдарламалары бойынша төрт жылдық оқудың гранттық құны 528 120 АҚШ долларын құрайды.

2026 жылғы 26-29 қазан аралығында SDU University базасында өтіп жатқан FAIO халықаралық олимпиадасы әлемнің түрлі елдерінен жиналған жас таланттарды біріктіреді. Қатысушылар жасанды интеллект саласындағы білімдерін, логикалық ойлау қабілеттерін және технологиялық мәселелерді шешу дағдыларын сынайды.

SDU University үшін білім беру – тек академиялық білім берумен шектелмей, дарынды жастардың әлеуетін ашуға, олардың бастамаларын қолдауға және болашақ кәсіби дамуына жол ашуға бағытталған маңызды миссия.

Университеттің 30 жылдық мерейтойы аясында ұсынылып отырған гранттар мен жеңілдіктер – осы миссияның нақты көрінісі. Бұл бастама білімге құштар, жаңа идеяларға ашық және технологиялық дамуға үлес қосуға дайын жастардың сапалы жоғары білім алуына мүмкіндік береді.

«Біз дарынды жастардың әлеуетіне инвестиция салуды болашаққа салынған инвестиция деп санаймыз. Университеттің 30 жылдығы – осы уақыт ішінде қалыптасқан білім беру дәстүрлерін жалғастырып қана қоймай, келешек ұрпақтың дамуына жаңа мүмкіндіктер ашатын маңызды кезең. FAIO сияқты халықаралық бастамаларды қолдау арқылы біз талантты жастарға өз қабілеттерін жүзеге асыруға және болашақта ғылым мен технологияның дамуына үлес қосуға мүмкіндік бергіміз келеді», – деп атап өтті SDU University ректоры Арман Жумажанов.

SDU University жасанды интеллект, ақпараттық технологиялар және инновациялар саласында білім алуға ұмтылған жастарды қолдау арқылы Қазақстанның зияткерлік әлеуетін арттыруға және халықаралық білім беру кеңістігіндегі ынтымақтастықты дамытуға үлес қосуды көздейді.

SDU University – әлемге жол ашатын білім!

SDU University-дің бес зерттеушісі Қазақстан Республикасы Ғылым және жоғары білім министрлігі Ғылым комитетінің 2026–2028 жылдарға арналған гранттық қаржыландыру конкурстарында жеңіске жетті.

«Жас ғалым» жобасы бойынша грант иегерлері:

– Бинара Иманкулова;
– Еркін Шаймерденов;
– Ғазиза Отарбаева;
– Қанат Байкенов.

Ғылыми және (немесе) ғылыми-техникалық жобалар бойынша жас ғалымдарды гранттық қаржыландыру конкурсының (КМУ) жеңімпазы:

– Баян Бекболат.

Бұл жетістік ғалымдарымыздың зерттеу жұмыстарының өзектілігі мен ғылыми әлеуетінің жоғары бағаланғанын көрсетеді. Жобалар 2026–2028 жылдар аралығында іске асырылып, ғылымның дамуына және жаңа ғылыми нәтижелердің қалыптасуына үлес қосады.

Жеңімпаздарды құттықтаймыз және жобаларын табысты жүзеге асыруға, маңызды ғылыми нәтижелерге қол жеткізуге тілектеспіз!

SDU University Extension Center мен Teach For Qazaqstan бірлесіп, білім беру саласындағы кәсіби мүмкіндіктерге арналған ақпараттық сессия өткізді.

Қатысушылар педагогикалық қайта даярлау бағдарламасымен, Teach For Qazaqstan жобасымен, ауыл мектептеріндегі жұмыс тәжірибесімен және кәсіби даму жолдарымен танысты.

Спикерлер:

• Meruyert Bizhanova — University of Oxford докторанты;
• Balausa Zholdaskhanova — Teach For Qazaqstan бағдарламасының 2-легінің түлегі және SDU Extension × Teach For Qazaqstan бағдарламасының түлегі.

Іс-шара модераторлары:

Aidyn Adilbekova — Педагогикалық қайта даярлау бөлімінің меңгерушісі;
Nurzhaina Kungradbayeva — Педагогикалық қайта даярлау бөлімінің менеджері.

SDU Extension Center ұйымдастырған «Білім берудегі жасанды интеллект: оқытуда ЖИ құралдарын практикалық қолдану» атты 80 сағаттық біліктілікті арттыру курсы сәтті аяқталды.

Курсқа 101 педагог қатысты. Олардың 84-і оқу бағдарламасын сәтті аяқтап, сертификат алды. Бағдарлама педагогтердің жасанды интеллект құралдарын білім беру үдерісінде тиімді әрі практикалық қолдану дағдыларын дамытуға бағытталды.

Курстың екінші легіне тіркеу басталды!

Екінші лек 2026 жылғы 2–20 қараша аралығында өтеді. Педагогтерді жасанды интеллект құралдарын меңгеріп, кәсіби дағдыларын жетілдіруге шақырамыз.

Курс туралы толық ақпарат алу және тіркелу үшін 8 776 702 31 34 нөміріне хабарласыңыз.

26–27 қазанда Almaty Museum of Arts-та Sustainable Central Asia: Silk Roads of Education, Arts, and AI халықаралық конференциясы өтті. SDU University атынан іс-шараға Стратегиялық даму департаментінің директоры Гульназ Тогузбаева спикер ретінде қатысты.

Конференцияны CIMEA-NARIC Italia және CIMEA Central Asia ұйымдары UNESCO және British Council-мен бірлесіп ұйымдастырды. Іс-шара сегіз елден келген мемлекеттік органдар, университеттер, халықаралық ұйымдар мен сарапшылардың 70-тен астам өкілін біріктірді.

Quality and Trust in Education сессиясында Гульназ Тогузбаева Data and Quality Management at SDU University тақырыбында баяндама жасады. Ол университеттің деректер мен сапаны басқару тәжірибесін, сондай-ақ ақпаратты шешім қабылдау мен білім беру және әкімшілік үдерістерді жетілдіруде пайдалану тәсілдерін таныстырды.

Сессияға UNESCO, Quality Assurance Agency for Higher Education (QAA UK) және Satbayev University өкілдері де қатысып, білім сапасын қамтамасыз ету, халықаралық ынтымақтастық пен білім беру жүйесіне деген сенімді нығайту мәселелерін талқылады.

Конференцияға қатысу SDU University-ге өз тәжірибесін халықаралық кәсіби ортада таныстырып, білім беру ұйымдары мен сарапшылар арасындағы байланысты кеңейтуге мүмкіндік берді.

SDU University ректоры Арман Жумажанов бастаған Университет делегациясы Қытайдың Chengdu қаласында өткен Europe–China Education-Industry Collaboration Forum-ға қатысты. Форум Қытай мен Еуропаның бизнес, академиялық және мемлекеттік саясат салалары өкілдерінің диалог алаңы саналатын The 19th Europe–China Business and Technology Cooperation Fair аясында ұйымдастырылды.

Форумды China Chamber of International Commerce (CCOIC) және Sichuan Laima Education ұйымдары China Center for International People-to-People Exchange, Ministry of Education, P.R. China қолдауымен өткізді. Іс-шараға университеттер, кәсіптік білім беру ұйымдары және индустрия өкілдері қатысып, білім беру жүйесінің экономикадағы өзгерістер мен еңбек нарығының қажеттіліктеріне бейімделу жолдарын талқылады.

SDU University ректоры Арман Жумажанов форумда сөз сөйлеп, білім беруді академиялық орта, жұмыс берушілер және халықаралық серіктестерді байланыстыратын ашық экожүйе ретінде дамыту жөніндегі университеттің көзқарасын таныстырды. Сондай-ақ ол Орталық Азия университеттерінің Еуразиядағы академиялық ынтымақтастықты дамытудағы рөлінің артып келе жатқанын атап өтті.

Форум аясында SDU University Қытайдың екі білім беру мекемесімен өзара түсіністік туралы меморандумдарға қол қойды. Келісімдер бірлескен білім беру бағдарламаларын әзірлеуге негіз қалайды.

SDU University-дің форумға қатысуы университеттің халықаралық диалогты дамытуға және студенттер мен оқытушылар үшін жаңа мүмкіндіктер ұсынатын серіктестік орнатуға ұмтылысын көрсетеді.