18 тамызда Алматы қаласының Білім басқармасы мен жоғары оқу орындары арасындағы өзара ынтымақтастық туралы меморандумдарға қол қою рәсімі өтті. Іс-шара білім беру саласындағы әріптестікті нығайтуға, педагог кадрларды даярлау, студенттердің тәжірибесін арттыру және ғылыми-әдістемелік бағыттардағы бірлескен жұмысты дамытуға арналды.

Жиынға Абай атындағы Қазақ ұлттық педагогикалық университетінің, Қазақ ұлттық қыздар педагогикалық университетінің, Абылай хан атындағы Қазақ халықаралық қатынастар және әлем тілдері университетінің, SDU University және De Montfort University ректорлары қатысты. Іс-шара барысында жоғары оқу орындары мен Алматы қаласының білім беру ұйымдары арасындағы ынтымақтастықтың негізгі бағыттары талқыланды.

SDU University ректоры Арман Жұмажанов өз сөзінде меморандумды жай ғана ресми құжат емес, мектеп пен университет арасындағы байланысты күшейтетін нақты қадам ретінде атап өтті. Оның айтуынша, университеттің міндеті болашақ педагогтерді даярлаумен ғана шектелмей, мектептермен бірлесіп жұмыс істеу, мұғалімдердің кәсіби дамуына қолдау көрсету және білім сапасын арттыруға үлес қосу болуы тиіс.

Ректор сондай-ақ педагогтердің кәсіби дамуы, студенттердің мектептердегі тәжірибесін күшейту, бірлескен зерттеулер жүргізу және жасанды интеллект пен цифрлық технологияларды білім беру үдерісінде тиімді әрі жауапкершілікпен қолдану бағыттарының маңызын атап өтті.

Кездесу соңында Алматы қаласының Білім басқармасы мен жоғары оқу орындары арасында өзара ынтымақтастық туралы меморандумдарға салтанатты түрде қол қойылды.

SDU University-дің Ақпараттық технологиялар және қолданбалы математика мектебінің он студентінен құралған SQQ x SDU University командасы Қазақстандағы алғашқы ұлттық әскери инженерлік чемпионат — «SHAIQAS 2026» финалдық кезеңіне қатысты.

«SHAIQAS 2026» чемпионатын Defence Tech Center Қазақстан Республикасының Қорғаныс министрлігі және Ғылым және жоғары білім министрлігінің қолдауымен ұйымдастырды. Финалдық кезең 14–15 тамызда Ақмола облысының Щучинск қаласындағы «Амандық» әскери полигонында өтті.

100 команданың ішінен — үздік 17 финалист қатарында

Іріктеу кезеңдерінің қорытындысы бойынша чемпионатқа қатысқан 100 команданың ішінен 17 команда финалдық кезеңге жолдама алды. Солардың қатарында SDU University атынан өнер көрсеткен SQQ x SDU University командасы да болды.

Команда мүшелері «Ақпараттық жүйелер» білім беру бағдарламасында білім алады. Финал барысында SDU студенттері чемпионаттың барлық төрт бағыты бойынша — әуе жүйелері, жерүсті жүйелері, киберқауіпсіздік және тактика — сынақтарға қатысты.

Чемпионаттың практикалық тапсырмалары барысында студенттер инженерлік және технологиялық шешімдерін нақты жағдайларға барынша жақын ортада сынақтан өткізді.

SDU және SQQ әзірлемесі ерекше назарда

Чемпионат барысында SDU University және SQQ қолдауымен әзірленген әмбебап өртке қарсы эвакуациялық ұшқышсыз жерүсті машинасы ерекше назар аударды. Техника технологиялық компаниялар өкілдерінің, журналистердің және Қазақстан Республикасы Қорғаныс министрлігі өкілдерінің қызығушылығын тудырды.

Әзірлемеге Қазақстан Республикасы Қорғаныс министрінің орынбасары да арнайы назар аударып, оның функционалына қарамастан прототиптің құны салыстырмалы түрде төмен екенін атап өтті. Оның бағалауынша, мұндай технологиялық шешімдер елдің қорғаныс қабілетін арттыруға және отандық әскери технологиялардың әлемдік нарықтағы бәсекеге қабілеттілігін күшейтуге ықпал ете алады.

Прототипті әзірлеу құны шамамен 20 млн теңгені құрады. Жоба SDU University және SQQ қолдауымен жүзеге асырылды.

Практикалық тәжірибе және жаңа мүмкіндіктер

«SHAIQAS 2026» әскери және азаматтық қатысушыларды бір алаңда біріктіріп, әуе және жерүсті жүйелерін, киберқауіпсіздік пен тактикалық дайындықты қамтыған кешенді форматта өтті. Қатысушылар өздерінің әзірлемелерін практикалық сынақтардан өткізіп, инженерлік шешімдерін нақты міндеттерге бейімдеді.

SDU University командасы чемпионат қорытындысы бойынша жүлделі орындарға ие болған жоқ. Дегенмен, 100 команданың ішінен финалға өткен 17 команданың қатарында болуы студенттер үшін маңызды тәжірибе болды.

Чемпионат қорытындысы бойынша Defence Tech Center және Қазақстан Республикасының Қорғаныс министрлігі мен Ғылым және жоғары білім министрлігінің атынан SDU University студенттеріне қатысқаны үшін сертификаттар табысталды.

«SHAIQAS 2026» финалы студенттерге өз білімдерін практикада қолдануға, инженерлік әзірлемелерін кәсіби ортада таныстыруға және заманауи технологиялар саласында тәжірибе жинауға мүмкіндік берді.

2026 жылғы мемлекеттік білім гранты конкурсының нәтижелері жарияланды.
Мемлекеттік білім гранты иегерлерінің толық тізімі осы сілтеме арқылы қолжетімді.

Биыл SDU University-дің білім беру бағдарламаларын 950-ге жуық талапкер мемлекеттік білім грантын иеленді.

Грант иегерлерінің қатарында ҰБТ-дан ең жоғары 140 балл жинаған талапкер бар. Сонымен қатар 135–139 балл аралығында жоғары нәтиже көрсеткен талапкерлердің де саны көп. Бұл SDU University-дің білім беру бағдарламаларына жоғары академиялық көрсеткіштері бар талапкерлердің қызығушылығы артып келе жатқанын көрсетеді. 

Барлық грант иегерлеріне жаңа оқу жылында сәттілік тілейміз.

SDU университетінің баспасөз қызметі Арман Жұмажановтың университет ректоры қызметіне тағайындалғанын хабарлайды.

Арман Жұмажанов жоғары білім беру саласындағы басқару, университеттік стратегия, интернационалдандыру және жоғары білім беру саясаты бағыттарында 15 жылдан астам тәжірибесі бар білікті басшы.

SDU университетіне келгенге дейін Арман Жұмажанов Nazarbayev University-де бірқатар басшылық қызметтерді атқарды. Атап айтқанда, Президент кеңсесінің басшысы (Chief of Staff), Халықаралық ынтымақтастық департаментінің директоры және Стратегия және талдау департаменті директорының міндетін атқарушы лауазымдарында еңбек етті. Кәсіби қызметі барысында ол Университеттің институционалдық трансформациясы, басқару жүйесін жетілдіру, стратегиялық жоспарлау, халықаралық әріптестікті дамыту және басқарушылық шешімдерді қабылдау үдерістеріне елеулі үлес қосты. Бұл бағыттағы жұмыстарды Университет басшылығымен, басқару органдарымен, мемлекеттік мекемелермен, халықаралық ұйымдармен және стратегиялық серіктестермен тығыз ынтымақтастықта жүзеге асырды. Сонымен қатар, 2021-2025 жылдар аралығында Қ. Жұбанов атындағы Ақтөбе өңірлік университетінің директорлар кеңесінің мүшесі қызметін атқарды.

Арман Жұмажанов – беделді халықаралық «Болашақ» стипендиясының иегері. Осы бағдарлама аясында ол Жоғары білім беруді басқару (Higher Education Administration) бағыты бойынша Indiana University Bloomington (АҚШ) университетінде білім алған. Сонымен қатар, мемлекеттік басқару магистрі (Nazarbayev University), іскерлік әкімшілендіру магистрі (Colorado State University Pueblo, АҚШ) және экономика бакалавры (Selçuk University, Түркия) дәрежелеріне ие.

Оның академиялық және кәсіби қызығушылықтары жоғары білімді басқару, институционалдық тиімділік, университеттік көшбасшылық, мемлекеттік саясат және стратегиялық менеджмент салаларын қамтиды.

Оның ғылыми және кәсіби қызығушылықтары жоғары білім беру жүйесін басқару, институционалдық тиімділік, университеттік көшбасшылық, мемлекеттік саясат және стратегиялық менеджмент бағыттарын қамтиды.

Басқарушылық қызметімен қатар, жаңа басшы халықаралық жоғары білім беру саласындағы ғылыми зерттеулер мен білім беру саясатын дамытуға да үлес қосып келеді. Ол TIAA Institute жариялаған, қайырымдылық қаржыландырудың студенттердің жоғары білімге қолжетімділігін кеңейту мен әлеуметтік мобильділікті арттырудағы рөлін зерттейтін ғылыми есептің тең авторы болды. Сонымен бірге, American Council on Education ұйымының аясында жүзеге асырылған ұлттық зерттеу жобаларына қатысып, Carnegie Classification of Institutions of Higher Education жіктеу жүйесін жетілдіруге үлес қосты.

Арман Жұмажанов халықаралық жоғары білім беру қауымдастығының белсенді мүшесі. Ол АҚШ-тағы Association for the Study of Higher Education (ASHE) және Association for Institutional Research (AIR) ұйымдарының мүшесі ретінде жоғары білім беру саясаты, университеттік басқару, көшбасшылық және институционалдық зерттеулер саласындағы өзекті мәселелер бойынша халықаралық сарапшылармен, зерттеушілермен және университет басшыларымен тұрақты кәсіби байланыс орнатып келеді.

SDU Университетінің ректоры ретінде Арман Жұмажанов Университеттің Орталық Азиядағы заманауи әрі даму үрдісін қалыптастыратын жетекші жоғары оқу орындарының бірі ретіндегі ұстанымын нығайтуды басты мақсаттарының бірі ретінде қарастырады. Оның басымдықтары қатарында академиялық сапаны арттыру, студентке бағдарланған білім беру моделін дамыту, қолданбалы ғылым мен инновацияны қолдау, халықаралық ынтымақтастықты кеңейту, тиімді басқару жүйесін жетілдіру және университеттің орнықты дамуын қамтамасыз ету бар. Сонымен қатар, Қазақстанның және жаһандық қоғамдастықтың дамуына үлес қоса алатын бәсекеге қабілетті түлектерді даярлау оның негізгі стратегиялық міндеттерінің бірі.

SDU University ұжымы университеттің дамуына қосқан елеулі үлесі үшін бұрынғы ректор Әлімжан Игенбаевқа алғыс білдіреді және алдағы қызметіне табыс тілейді. Сондай-ақ Арман Жұмажановқа ректор қызметінде сәттілік тілеп, оның басшылығымен университеттің жаңа белестерді бағындыратынына сенім білдіреді.

SDU University мен «BF MEREKE» Қоғамдық қайырымдылық қоры 3–4 курс студенттерін MEREKE Scholarship Program бағдарламасына қатысуға шақырады.

Стипендия:

• 50 000 ₸ ай сайын
• 30 студентке

Өтінім қабылдау мерзімі: 1–12 тамыз

Қатысу талаптары:

• GPA – 3.5 және жоғары
• ҚР азаматы
• CV және Recommendation Letter
• Тәртіптік жаза болмауы

Сұхбат: 26–27 тамыз

Қосымша ақпарат:
grantoffice@sdu.edu.kz

Grant Office | I112

DEM ALL (English Edition) – SDU Extension Center ұйымдастыратын 8 – 14 жас аралығындағы мектеп оқушыларына арналған жазғы тілдік мектеп. Бағдарлама қарқынды ағылшын тілі сабақтарын тәжірибелік жұмыстармен және XXI ғасыр дағдыларын дамытуға бағытталған іс-шаралармен ұштастырады.

2026 жылдың жазында бағдарлама екі маусымда өтіп, 75 оқушыны қамтыды:

I маусым: 15 – 26 маусым 2026 жыл

II маусым: 13 – 24 шілде 2026 жыл

Әр маусымда 40 академиялық сағат ағылшын тілі сабағы өткізілді. Сонымен қатар қатысушылар робототехника, актерлік шеберлік, сторителлинг, арт-терапия, мобилография, алғашқы көмек көрсету, аспаздық шеберлік сабақтары, интеллектуалдық ойындар және басқа да интерактивті іс-шараларға қатысты.

Бағдарлама қатысушылардың ағылшын тілін, коммуникативтік дағдыларын, шығармашылығын, өзіне деген сенімділігін және командада жұмыс істеу қабілетін дамытуға мүмкіндік берді.

DEM ALL бағдарламасының келесі маусымына қосылыңыз!

SDU Extension Center, SDU University
+7 (707) 702-31-34
Instagram: @sdu.extension

SDU University қауымдастырылған профессоры, PhD докторы Самат Максутов жетекшілік еткен Қазақстанның ұлттық құрамасы Халықаралық физика олимпиадасында (IPhO 2026) тарихи нәтижеге қол жеткізді. Қазақстан құрамасы алғаш рет бес бірдей алтын медаль жеңіп алып, ел тарихындағы және халықаралық пәндік олимпиадалар тарихындағы ең үздік көрсеткішті тіркеді.

2026 жылғы 4–12 шілде аралығында Колумбияның Букараманга қаласында өткен беделді білім бәйгесіне әлемнің 85 елінен 381 оқушы қатысты. Дәстүрлі түрде физикадан ең мықты құрамалар саналатын Қытай, Оңтүстік Корея, Үндістан және Ресей секілді мемлекеттердің қатысуымен өткен додада Қазақстан құрамасының барлық бес мүшесі де алтын медаль иеленді.

Алтын медаль иегерлері:

• Нұргүл Егенбергенова;
• Әмірбек Азатбеков;
• Ілияс Қазымбек;
• Роман Черемнов;
• Дамир Құрман.

Бұл – Қазақстанның Халықаралық физика олимпиадасына қатысу тарихындағы ең жоғары нәтиже. Айта кетейік, IPhO олимпиадасы 1967 жылдан бері өткізіліп келеді, ал Қазақстан бұл халықаралық білім сайысына 1997 жылдан бастап тұрақты қатысып келеді.

Ұлттық құраманы SDU University қауымдастырылған профессоры, PhD докторы Самат Максутов пен физикадан халықаралық олимпиадалардың жүлдегері Алишер Еркебаев дайындады. Жетекшілердің негізгі міндеті – еліміздің дарынды оқушыларын іріктеп, оларды халықаралық деңгейдегі білім бәсекелеріне жан-жақты әзірлеу. Бұл жұмыс терең пәндік білімді, халықаралық тәжірибені және жоғары деңгейдегі ағылшын тілін меңгеруді талап етеді.

Олимпиада жеңімпаздарын Алматы халықаралық әуежайында салтанатты қарсы алу рәсімі өтті. Іс-шараға Қазақстан Республикасының Оқу-ағарту министрі Жұлдыз Сүлейменова, Алматы қаласы әкімінің орынбасары Абзал Нүкенов, «Дарын» республикалық ғылыми-практикалық орталығының директоры Тимур Давлет және Алматы қаласы Білім басқармасының басшысы Сәкен Аралбаев қатысып, жеңімпаздарды тарихи жетістіктерімен құттықтады.

SDU University үшін профессорлар мен оқытушылардың халықаралық деңгейдегі ғылыми және академиялық жетістіктері – университеттің білім сапасы мен кәсіби әлеуетінің айқын көрінісі.

SDU University ұжымы қауымдастырылған профессор, PhD докторы Самат Максутовты кезекті тарихи жетістігімен шын жүректен құттықтайды. Ғалымға ғылыми-зерттеу қызметінде толағай табыс, халықаралық аренада жаңа жеңістер мен биік белестер тілейміз.

SDU University-де ваканттық білім беру гранттарына өтініш қабылдау басталды.

Өтініш беру талаптары:

1. Өтінішті ақылы негізде білім алатын студенттер, сондай-ақ Freedom грантының, әкімдік грантының және ішкі гранттың иегерлері бере алады.
2. Үміткер Қазақстан Республикасының азаматы болуы тиіс.
3. Барлық оқу кезеңі бойынша GPA көрсеткіші 2,5-тен жоғары болуы қажет.
4. «F», «FX», «AW» немесе «NP» бағалары бар студенттер конкурсқа қатыса алмайды.
5. Өтініш қоса берілген файлдағы үлгіге сәйкес рәсімделуі тиіс. Сонымен қатар, «Ваканттық білім беру гранты» Google-формасын міндетті түрде толтыру қажет. Қате толтырылған мәліметтер өтініштің қабылданбауына себеп болуы мүмкін.
6. Өтініштер 2026 жылғы 20 шілде сағат 17:30-ға дейін қабылданады.

Назар аударыңыз:
Белгіленген талаптарға сәйкес келмейтін өтініштер қаралмайды.

Қосымша ақпарат: ssc@sdu.edu.kz