SDU University Алматы қаласында алғашқы қалалық кеңістігі — SDU Almaty Hub-ты іске қосты. Жаңа хаб қаланың тарихи орталығындағы, алматылықтар арасында Old Square атауымен танымал ауданда орналасқан. Бұл — Алматының іскерлік және мәдени өмірі тоғысқан, қаланың өзіндік атмосферасы мен тарихын сақтаған ерекше орталық. Дәл осы жерде университет білім беру ортасын, кәсіби қауымдастықты және қалалық ортаны біріктіретін жаңа кеңістік қалыптастырып отыр.

SDU Almaty Hub-тың ашылу салтанатына Қазақстан Республикасы Президенті жанындағы Қазақстан Ұлттық ғылым академиясының вице-президенті, физика-математика ғылымдарының докторы, профессор, Қазақстан Ұлттық ғылым академиясының академигі әрі SDU Қамқоршылық кеңесінің мүшесі Асқар Жұмаділдаев, Sergek Group компаниясының негізін қалаушы, кәсіпкер, меценат, SDU түлегі және университеттің Қамқоршылық кеңесінің мүшесі Асет Ахметов, сондай-ақ SDU University ректоры Арман Жумажанов қатысты.

«Қаскелеңдегі негізгі кампусымыздан өзгеше, SDU Almaty Hub жұмыс күнінен кейін келуге, пікірлес жандармен кездесуге, ашық дәрістерге қатысуға немесе білімін одан әрі жалғастыру мүмкіндіктері туралы кеңес алуға қолайлы кеңістік ретінде ойластырылды», — деді SDU University ректоры Арман Жұмажанов.

SDU Almaty Hub-та не ұсынылады

Жаңа кеңістікте:

• Магистратура, докторантура, MBA және Executive MBA бағдарламалары бойынша кеңес беру және құжат қабылдау;
• Ашық дәрістер, шеберлік сабақтары және білім беру іс-шаралары;
• Түлектер, студенттер, бизнес өкілдері мен сарапшылардың кездесулері;
• Кәсіби қарым-қатынас пен бірлескен жұмысқа арналған нетворкинг аймағы ұйымдастырылады.

Хаб академиялық қоғамдастықты, индустрия өкілдерін және жас мамандарды біріктіретін тұрақты білім беру және кәсіби іс-шаралар өтетін алаңға айналады.

SDU University: халықаралық деңгейде мойындалған университет

1996 жылы құрылған SDU University биыл өзінің 30 жылдығын атап өтуде. Осы уақыт ішінде университет заманауи академиялық ортаны қалыптастырып, ақпараттық технологиялар, инженерия, бизнес, экономика, білім беру және гуманитарлық ғылымдар бағыттары бойынша бакалавриат, магистратура және докторантура бағдарламаларын дамытты.

Университеттің басты басымдықтарының бірі — жоғары оқу орнынан кейінгі білім беру. SDU магистратура, докторантура, MBA және Executive MBA бағдарламаларын ұсынады. Олардың қатарында С. Д. Асфендияров атындағы Қазақ ұлттық медицина университетімен бірлесіп жүзеге асырылатын «Денсаулық сақтаудағы менеджмент» MBA бағдарламасы бар, оның түлектері екі диплом алады.

SDU сондай-ақ Лондондағы Birkbeck University of London университетімен бірлесіп MSc (Master of Science) in Psychology бағдарламасын жүзеге асырады. Студенттер SDU кампусында білім алып, оқуын аяқтағаннан кейін британдық университеттің дипломына ие болады.

Сонымен қатар SDU International Baccalaureate (IB) Educator Network тарапынан педагогтерді даярлауға ресми түрде мойындалған Орталық Азиядағы алғашқы университет болып табылады. Университет FIBAA халықаралық институционалдық аккредитациясына ие және QS пен Times Higher Education халықаралық рейтингтерінде ұсынылған.

SDU Almaty Hub-тың іске қосылуы университеттің жоғары оқу орнынан кейінгі білім беруді дамытудағы жаңа кезеңін айқындайды. Жаңа кеңістік магистратура, MBA және басқа да бағдарламаларды Алматыдағы мамандар мен жас кәсіби мамандар үшін қолжетімді етіп, білім беру іс-шаралары мен кәсіби нетворкингтің жаңа алаңына айналады.

10 қыркүйекте SDU University-де Stanford University докторанты, Knight-Hennessy стипендиясының тұңғыш қазақстандық иегері және RAISE Fellow Әсел Ибадулла қонақ дәрісін өткізді.

Әсел – Nazarbayev University және Yale University түлегі. Ол Yale School of Medicine және Harvard T.H. Chan School of Public Health мекемелерінде ғылыми қызмет атқарған, сондай-ақ Forbes Kazakhstan журналының «30 Under 30» тізіміне енген.

Кездесу барысында Әсел студенттерге университеттегі оқу жылдарын тиімді пайдалану, зерттеу, волонтерлік және көшбасшылық мүмкіндіктерді табу, сондай-ақ шетелдік университеттер мен халықаралық стипендиялық бағдарламаларға өтінімдерді күшейту туралы практикалық кеңестерімен бөлісті.

Дәріс студенттерге халықаралық академиялық орта туралы пайдалы ақпарат алып, өздерінің білім беру және кәсіби мүмкіндіктерін кеңейтуге арналған нақты ұсыныстар алуға мүмкіндік берді.

SDU University ректоры Арман Жұмажанов Student Government өкілдерімен кездесті. Кездесу барысында студенттік бастамаларды дамыту және студенттер мен университет басшылығы арасындағы тікелей байланысты күшейту мәселелері талқыланды.

Student Government құрамына университет өміріне белсенді араласатын, студенттердің мүддесін білдіретін талантты және белсенді студенттер — президент, министрлер және олардың командалары кіреді. Әр министр өз бағыты бойынша студенттерден құралған жеке командамен жұмыс істейді.

Student Government президенті – Айым Нуржанова. Ол SDU-ға 2025 жылы ҰБТ-дан 140 балл жинап, ең жоғары нәтижемен оқуға түсті.

Ректор студенттерге атқарып жатқан жұмыстары үшін алғысын білдіріп, олардың университет өміріндегі маңызды рөлін атап өтті. Сондай-ақ университет студенттердің жаңа идеялары мен бастамаларын қолдауға дайын екенін жеткізді.

Кездесуде студенттік клубтарды дамытуға да ерекше назар аударылды. Қазіргі таңда SDU-да 43-тен астам студенттік клуб жұмыс істейді. Ректор Student Government мүшелерін жаңа клубтар ашып, іс-шаралар санын арттырып, студенттердің қызығушылықтары мен заманауи сұраныстарына сай жаңа форматтарды дамытуға шақырды.

«Бүгінде технология, коммуникация және жастардың қызығушылықтары үнемі өзгеріп келеді. Сондықтан біз де алға ұмтылып, жаңа мүмкіндіктер жасауымыз керек. Бірге жұмыс істейік – университет сіздердің идеяларыңызды қолдауға және оларды жүзеге асыруға дайын», – деді ректор.

Студенттермен тұрақты диалогты жалғастыру үшін Арман Жұмажанов Student Government мүшелерімен әр екі апта сайын, сейсенбі күні сағат 14:30-да кездесіп тұратын болады. Кездесулерде студенттер өз идеяларын, жобаларын және ұсыныстарын ректормен тікелей талқылай алады.

2026 жылғы 17–28 тамыз аралығында SDU Extension Center ұйымдастыруымен QBIS мектебінің педагогтеріне арналған 80 академиялық сағаттық «Мектеп негізіндегі ғылыми зерттеу» біліктілікті арттыру курсы офлайн және онлайн форматта өтті.

Курс аясында педагогтер жобалық оқыту, оқушылармен ғылыми-зерттеу жұмыстарын ұйымдастыру, зерттеу әдіснамасы, бағалау, цифрлық және AI құралдарын қолдану бағыттары бойынша білімдерін жетілдірді.

21 тамызда SDU University қабырғасында курс қатысушылары үшін арнайы ашық ақпараттық сессия ұйымдастырылды. Сессияға оқушыларды ғылыми жобаларға дайындау бойынша тәжірибесі бар шақырылған сарапшылармен қатар, SDU University профессорлары мен оқытушылары қатысты.

Курс спикерлері:

• Азат Қали — PhD, «Пәнаралық зерттеу орталығының» директоры;
• Гүлбаршын Қырғызхан — PhD, аға оқытушы;
• Бауыржан Қазиев — PhD in Education, Nottingham University, UK.

Курс талаптарын сәтті орындаған қатысушыларға аттестаттау кезінде жарамды 80 академиялық сағаттық сертификаттар табысталды.

SDU Extension Center білім беру ұйымдарының қажеттіліктеріне сәйкес педагогтерге арналған біліктілікті арттыру және кәсіби даму бағдарламаларын ұйымдастыруды жалғастыруда.

Байланыс:
+7 776 702 31 34
extension.school@sdu.edu.kz

2026 жылғы 17–27 тамыз аралығында SDU Extension Center ұйымдастыруымен Tamos High School педагогтеріне арналған «Оқытуда интербелсенді әдістерді қолданудың тактикалары» атты 80 сағаттық біліктілікті арттыру курсы өткізілді.

Курс мектептің сұранысы негізінде ұйымдастырылып, жаратылыстану және гуманитарлық бағыттағы 20 педагогті қамтыды. Оқу үдерісі толықтай ағылшын тілінде және офлайн форматта жүзеге асырылды.

Бағдарлама Қазақстан Республикасы Оқу-ағарту министрлігі бекіткен біліктілікті арттыру бағдарламаларының мемлекеттік реестріне енгізілген және педагогтерді аттестаттаудан өту үшін жарамды.

Курс барысында қатысушылар үш негізгі бағыт бойынша кәсіби құзыреттерін жетілдірді:

• Module 1: Lesson Planning – сабақтарды тиімді жоспарлау;
• Module 2: Student Engagement – оқушыларды оқу үдерісіне белсенді тарту;
• Module 3: Interactive Methods – оқытуда интербелсенді әдістерді тиімді қолдану.

Бағдарлама аясында халықаралық академиялық тәжірибесі бар сарапшылар дәріс және практикалық сессиялар өткізді:

• Idriss Musa Garba, PhD — Bingham University, Nigeria;
• Meruyert Bizhanova, PhD Candidate — University of Oxford, Department of Education, UK;
• Madina Ashirimbetova, PhD Candidate — Academic Mobility, Universitas Negeri Yogyakarta, Indonesia, Senior Lecturer, SDU University.

Курс барысында педагогтер заманауи оқыту әдістерін практикада қолданып, сабақ үдерісін тиімді ұйымдастырудың заманауи тәсілдерімен танысты.

Курс талаптарын барлық 20 қатысушы толық орындап, нәтижесінде педагогтерді аттестаттаудан өту үшін жарамды біліктілікті арттыру сертификаттарына ие болды.

SDU Extension Center білім беру ұйымдарының қажеттіліктеріне сәйкес педагогтерге арналған біліктілікті арттыру және кәсіби даму бағдарламаларын ұйымдастыруды жалғастыруда.

Байланыс:
+7 776 702 31 34
extension.school@sdu.edu.kz 

2026 жылғы 17–27 тамыз аралығында SDU Extension Center және STEM орталығының ұйымдастыруымен «STEM Интеграциясы: мұғалім құзыреттілігін жүйелі түрде арттыру» атты 80 сағаттық біліктілікті арттыру курсы өтті. Курсқа 22 педагог қатысты.

Курс барысында қатысушылар STEM және робототехника саласындағы заманауи білім беру тәсілдерімен танысып, тәжірибелік дағдыларын жетілдірді. Бағдарламада FIRST жарыстарының құрылымы мен ерекшеліктері қарастырылып, FLL Challenge, FTC, Electronics, 3D Printing және Drone бағыттары бойынша тәжірибелік сабақтар өткізілді.

Курс спикерлері:

• Тимур Макажанов — FLL Challenge;
• Дильназ Мырзахмет — FTC;
• Ансар Мұрат — Electronics;
• Жасмин Шөмекей — 3D Printing;
• Ардақ Артықбаева — Drone.
• Курс соңында қатысушыларға ресми реестрге енгізілген және педагогтерді аттестаттау

кезінде жарамды 80 сағаттық біліктілікті арттыру сертификаттары табысталды. Барлық қатысушыларды курсты сәтті аяқтауымен құттықтап, алдағы кәсіби жолдарына сәттілік тілейміз! Сондай-ақ аталған курстың келесі легін өткізу жоспарланып отырғанын хабарлаймыз. Жаңа оқу мерзімі мен тіркелу туралы толық ақпарат жақын арада жарияланады.

18 тамызда Алматы қаласының Білім басқармасы мен жоғары оқу орындары арасындағы өзара ынтымақтастық туралы меморандумдарға қол қою рәсімі өтті. Іс-шара білім беру саласындағы әріптестікті нығайтуға, педагог кадрларды даярлау, студенттердің тәжірибесін арттыру және ғылыми-әдістемелік бағыттардағы бірлескен жұмысты дамытуға арналды.

Жиынға Абай атындағы Қазақ ұлттық педагогикалық университетінің, Қазақ ұлттық қыздар педагогикалық университетінің, Абылай хан атындағы Қазақ халықаралық қатынастар және әлем тілдері университетінің, SDU University және De Montfort University ректорлары қатысты. Іс-шара барысында жоғары оқу орындары мен Алматы қаласының білім беру ұйымдары арасындағы ынтымақтастықтың негізгі бағыттары талқыланды.

SDU University ректоры Арман Жұмажанов өз сөзінде меморандумды жай ғана ресми құжат емес, мектеп пен университет арасындағы байланысты күшейтетін нақты қадам ретінде атап өтті. Оның айтуынша, университеттің міндеті болашақ педагогтерді даярлаумен ғана шектелмей, мектептермен бірлесіп жұмыс істеу, мұғалімдердің кәсіби дамуына қолдау көрсету және білім сапасын арттыруға үлес қосу болуы тиіс.

Ректор сондай-ақ педагогтердің кәсіби дамуы, студенттердің мектептердегі тәжірибесін күшейту, бірлескен зерттеулер жүргізу және жасанды интеллект пен цифрлық технологияларды білім беру үдерісінде тиімді әрі жауапкершілікпен қолдану бағыттарының маңызын атап өтті.

Кездесу соңында Алматы қаласының Білім басқармасы мен жоғары оқу орындары арасында өзара ынтымақтастық туралы меморандумдарға салтанатты түрде қол қойылды.

SDU University-дің Ақпараттық технологиялар және қолданбалы математика мектебінің он студентінен құралған SQQ x SDU University командасы Қазақстандағы алғашқы ұлттық әскери инженерлік чемпионат — «SHAIQAS 2026» финалдық кезеңіне қатысты.

«SHAIQAS 2026» чемпионатын Defence Tech Center Қазақстан Республикасының Қорғаныс министрлігі және Ғылым және жоғары білім министрлігінің қолдауымен ұйымдастырды. Финалдық кезең 14–15 тамызда Ақмола облысының Щучинск қаласындағы «Амандық» әскери полигонында өтті.

100 команданың ішінен — үздік 17 финалист қатарында

Іріктеу кезеңдерінің қорытындысы бойынша чемпионатқа қатысқан 100 команданың ішінен 17 команда финалдық кезеңге жолдама алды. Солардың қатарында SDU University атынан өнер көрсеткен SQQ x SDU University командасы да болды.

Команда мүшелері «Ақпараттық жүйелер» білім беру бағдарламасында білім алады. Финал барысында SDU студенттері чемпионаттың барлық төрт бағыты бойынша — әуе жүйелері, жерүсті жүйелері, киберқауіпсіздік және тактика — сынақтарға қатысты.

Чемпионаттың практикалық тапсырмалары барысында студенттер инженерлік және технологиялық шешімдерін нақты жағдайларға барынша жақын ортада сынақтан өткізді.

SDU және SQQ әзірлемесі ерекше назарда

Чемпионат барысында SDU University және SQQ қолдауымен әзірленген әмбебап өртке қарсы эвакуациялық ұшқышсыз жерүсті машинасы ерекше назар аударды. Техника технологиялық компаниялар өкілдерінің, журналистердің және Қазақстан Республикасы Қорғаныс министрлігі өкілдерінің қызығушылығын тудырды.

Әзірлемеге Қазақстан Республикасы Қорғаныс министрінің орынбасары да арнайы назар аударып, оның функционалына қарамастан прототиптің құны салыстырмалы түрде төмен екенін атап өтті. Оның бағалауынша, мұндай технологиялық шешімдер елдің қорғаныс қабілетін арттыруға және отандық әскери технологиялардың әлемдік нарықтағы бәсекеге қабілеттілігін күшейтуге ықпал ете алады.

Прототипті әзірлеу құны шамамен 20 млн теңгені құрады. Жоба SDU University және SQQ қолдауымен жүзеге асырылды.

Практикалық тәжірибе және жаңа мүмкіндіктер

«SHAIQAS 2026» әскери және азаматтық қатысушыларды бір алаңда біріктіріп, әуе және жерүсті жүйелерін, киберқауіпсіздік пен тактикалық дайындықты қамтыған кешенді форматта өтті. Қатысушылар өздерінің әзірлемелерін практикалық сынақтардан өткізіп, инженерлік шешімдерін нақты міндеттерге бейімдеді.

SDU University командасы чемпионат қорытындысы бойынша жүлделі орындарға ие болған жоқ. Дегенмен, 100 команданың ішінен финалға өткен 17 команданың қатарында болуы студенттер үшін маңызды тәжірибе болды.

Чемпионат қорытындысы бойынша Defence Tech Center және Қазақстан Республикасының Қорғаныс министрлігі мен Ғылым және жоғары білім министрлігінің атынан SDU University студенттеріне қатысқаны үшін сертификаттар табысталды.

«SHAIQAS 2026» финалы студенттерге өз білімдерін практикада қолдануға, инженерлік әзірлемелерін кәсіби ортада таныстыруға және заманауи технологиялар саласында тәжірибе жинауға мүмкіндік берді.

2026 жылғы мемлекеттік білім гранты конкурсының нәтижелері жарияланды.
Мемлекеттік білім гранты иегерлерінің толық тізімі осы сілтеме арқылы қолжетімді.

Биыл SDU University-дің білім беру бағдарламаларын 950-ге жуық талапкер мемлекеттік білім грантын иеленді.

Грант иегерлерінің қатарында ҰБТ-дан ең жоғары 140 балл жинаған талапкер бар. Сонымен қатар 135–139 балл аралығында жоғары нәтиже көрсеткен талапкерлердің де саны көп. Бұл SDU University-дің білім беру бағдарламаларына жоғары академиялық көрсеткіштері бар талапкерлердің қызығушылығы артып келе жатқанын көрсетеді. 

Барлық грант иегерлеріне жаңа оқу жылында сәттілік тілейміз.

SDU университетінің баспасөз қызметі Арман Жұмажановтың университет ректоры қызметіне тағайындалғанын хабарлайды.

Арман Жұмажанов жоғары білім беру саласындағы басқару, университеттік стратегия, интернационалдандыру және жоғары білім беру саясаты бағыттарында 15 жылдан астам тәжірибесі бар білікті басшы.

SDU университетіне келгенге дейін Арман Жұмажанов Nazarbayev University-де бірқатар басшылық қызметтерді атқарды. Атап айтқанда, Президент кеңсесінің басшысы (Chief of Staff), Халықаралық ынтымақтастық департаментінің директоры және Стратегия және талдау департаменті директорының міндетін атқарушы лауазымдарында еңбек етті. Кәсіби қызметі барысында ол Университеттің институционалдық трансформациясы, басқару жүйесін жетілдіру, стратегиялық жоспарлау, халықаралық әріптестікті дамыту және басқарушылық шешімдерді қабылдау үдерістеріне елеулі үлес қосты. Бұл бағыттағы жұмыстарды Университет басшылығымен, басқару органдарымен, мемлекеттік мекемелермен, халықаралық ұйымдармен және стратегиялық серіктестермен тығыз ынтымақтастықта жүзеге асырды. Сонымен қатар, 2021-2025 жылдар аралығында Қ. Жұбанов атындағы Ақтөбе өңірлік университетінің директорлар кеңесінің мүшесі қызметін атқарды.

Арман Жұмажанов – беделді халықаралық «Болашақ» стипендиясының иегері. Осы бағдарлама аясында ол Жоғары білім беруді басқару (Higher Education Administration) бағыты бойынша Indiana University Bloomington (АҚШ) университетінде білім алған. Сонымен қатар, мемлекеттік басқару магистрі (Nazarbayev University), іскерлік әкімшілендіру магистрі (Colorado State University Pueblo, АҚШ) және экономика бакалавры (Selçuk University, Түркия) дәрежелеріне ие.

Оның академиялық және кәсіби қызығушылықтары жоғары білімді басқару, институционалдық тиімділік, университеттік көшбасшылық, мемлекеттік саясат және стратегиялық менеджмент салаларын қамтиды.

Оның ғылыми және кәсіби қызығушылықтары жоғары білім беру жүйесін басқару, институционалдық тиімділік, университеттік көшбасшылық, мемлекеттік саясат және стратегиялық менеджмент бағыттарын қамтиды.

Басқарушылық қызметімен қатар, жаңа басшы халықаралық жоғары білім беру саласындағы ғылыми зерттеулер мен білім беру саясатын дамытуға да үлес қосып келеді. Ол TIAA Institute жариялаған, қайырымдылық қаржыландырудың студенттердің жоғары білімге қолжетімділігін кеңейту мен әлеуметтік мобильділікті арттырудағы рөлін зерттейтін ғылыми есептің тең авторы болды. Сонымен бірге, American Council on Education ұйымының аясында жүзеге асырылған ұлттық зерттеу жобаларына қатысып, Carnegie Classification of Institutions of Higher Education жіктеу жүйесін жетілдіруге үлес қосты.

Арман Жұмажанов халықаралық жоғары білім беру қауымдастығының белсенді мүшесі. Ол АҚШ-тағы Association for the Study of Higher Education (ASHE) және Association for Institutional Research (AIR) ұйымдарының мүшесі ретінде жоғары білім беру саясаты, университеттік басқару, көшбасшылық және институционалдық зерттеулер саласындағы өзекті мәселелер бойынша халықаралық сарапшылармен, зерттеушілермен және университет басшыларымен тұрақты кәсіби байланыс орнатып келеді.

SDU Университетінің ректоры ретінде Арман Жұмажанов Университеттің Орталық Азиядағы заманауи әрі даму үрдісін қалыптастыратын жетекші жоғары оқу орындарының бірі ретіндегі ұстанымын нығайтуды басты мақсаттарының бірі ретінде қарастырады. Оның басымдықтары қатарында академиялық сапаны арттыру, студентке бағдарланған білім беру моделін дамыту, қолданбалы ғылым мен инновацияны қолдау, халықаралық ынтымақтастықты кеңейту, тиімді басқару жүйесін жетілдіру және университеттің орнықты дамуын қамтамасыз ету бар. Сонымен қатар, Қазақстанның және жаһандық қоғамдастықтың дамуына үлес қоса алатын бәсекеге қабілетті түлектерді даярлау оның негізгі стратегиялық міндеттерінің бірі.

SDU University ұжымы университеттің дамуына қосқан елеулі үлесі үшін бұрынғы ректор Әлімжан Игенбаевқа алғыс білдіреді және алдағы қызметіне табыс тілейді. Сондай-ақ Арман Жұмажановқа ректор қызметінде сәттілік тілеп, оның басшылығымен университеттің жаңа белестерді бағындыратынына сенім білдіреді.