SDU University қауымдастырылған профессоры, PhD докторы Самат Максутов жетекшілік еткен Қазақстанның ұлттық құрамасы Халықаралық физика олимпиадасында (IPhO 2026) тарихи нәтижеге қол жеткізді. Қазақстан құрамасы алғаш рет бес бірдей алтын медаль жеңіп алып, ел тарихындағы және халықаралық пәндік олимпиадалар тарихындағы ең үздік көрсеткішті тіркеді.

2026 жылғы 4–12 шілде аралығында Колумбияның Букараманга қаласында өткен беделді білім бәйгесіне әлемнің 85 елінен 381 оқушы қатысты. Дәстүрлі түрде физикадан ең мықты құрамалар саналатын Қытай, Оңтүстік Корея, Үндістан және Ресей секілді мемлекеттердің қатысуымен өткен додада Қазақстан құрамасының барлық бес мүшесі де алтын медаль иеленді.

Алтын медаль иегерлері:

• Нұргүл Егенбергенова;
• Әмірбек Азатбеков;
• Ілияс Қазымбек;
• Роман Черемнов;
• Дамир Құрман.

Бұл – Қазақстанның Халықаралық физика олимпиадасына қатысу тарихындағы ең жоғары нәтиже. Айта кетейік, IPhO олимпиадасы 1967 жылдан бері өткізіліп келеді, ал Қазақстан бұл халықаралық білім сайысына 1997 жылдан бастап тұрақты қатысып келеді.

Ұлттық құраманы SDU University қауымдастырылған профессоры, PhD докторы Самат Максутов пен физикадан халықаралық олимпиадалардың жүлдегері Алишер Еркебаев дайындады. Жетекшілердің негізгі міндеті – еліміздің дарынды оқушыларын іріктеп, оларды халықаралық деңгейдегі білім бәсекелеріне жан-жақты әзірлеу. Бұл жұмыс терең пәндік білімді, халықаралық тәжірибені және жоғары деңгейдегі ағылшын тілін меңгеруді талап етеді.

Олимпиада жеңімпаздарын Алматы халықаралық әуежайында салтанатты қарсы алу рәсімі өтті. Іс-шараға Қазақстан Республикасының Оқу-ағарту министрі Жұлдыз Сүлейменова, Алматы қаласы әкімінің орынбасары Абзал Нүкенов, «Дарын» республикалық ғылыми-практикалық орталығының директоры Тимур Давлет және Алматы қаласы Білім басқармасының басшысы Сәкен Аралбаев қатысып, жеңімпаздарды тарихи жетістіктерімен құттықтады.

SDU University үшін профессорлар мен оқытушылардың халықаралық деңгейдегі ғылыми және академиялық жетістіктері – университеттің білім сапасы мен кәсіби әлеуетінің айқын көрінісі.

SDU University ұжымы қауымдастырылған профессор, PhD докторы Самат Максутовты кезекті тарихи жетістігімен шын жүректен құттықтайды. Ғалымға ғылыми-зерттеу қызметінде толағай табыс, халықаралық аренада жаңа жеңістер мен биік белестер тілейміз.

Құрметті студенттер мен талапкерлер!

«KAZENERGY» қауымдастығы 2026–2027 оқу жылына жоғары және жоғары оқу орнынан кейінгі білім беру ұйымдарында оқу ақысын төлеуге арналған гранттар байқауына өтінім қабылдау басталғанын хабарлайды.

Гранттар «KAZENERGY» қауымдастығының Мердігерлері – NCOC N.V. және KPO B.V. бөлетін қаражат есебінен қаржыландырылады.

Гранттық бағдарлама туралы

Бағдарлама жүзеге асырылған 11 жыл ішінде жоғары оқу орындары мен колледж студенттерінен 16 мыңнан астам өтінім қабылданып, 5 800-ден астам білім алушы грант иегері атанды. Қаржыландыруға ие болған студенттердің 60,2%-ы әлеуметтік осал санаттарға жатады.

Өтінім қабылдау мерзімі:

• Басталуы: 2026 жылғы 25 шілде
• Аяқталуы: 2026 жылғы 31 тамыз

Қатысу шарттары

Байқауға қатысу талаптары мен қажетті құжаттардың толық тізімі KAZENERGY қауымдастығының ресми сайтында жарияланған.

Байланыс ақпараты

Қосымша ақпарат алу үшін:

• Тел.: +7 (7172) 79-49-75
• E-mail: candidate@kazenergy.com

2026 жылғы 29 маусым мен 10 шілде аралығында SDU Extension Center ұйымдастырған DEM ALL (Korean Edition) – Summer Edition 2026 жазғы тілдік мектебі өз мәресіне жетті.

Бағдарлама мектеп оқушылары мен ересек тыңдаушыларды біріктіріп, корей тілі мен мәдениетін тереңірек меңгеруге мүмкіндік берді. Жазғы мектепке барлығы 33 қатысушы қатысып, тілдік дайындық деңгейіне сәйкес үш топта білім алды.

Екі апта бойы қатысушылар корей тілінің негізгі дағдыларын жетілдіріп, тәжірибелік сабақтар арқылы білімдерін нығайтты. Сонымен қатар, бағдарлама аясында корей мәдениетімен танысуға бағытталған танымдық кездесулер, шығармашылық және спорттық іс-шаралар ұйымдастырылды. Қатысушылар K-pop мәдениетін жақынырақ танып, жаңа достар тауып, ұмытылмас тәжірибе жинақтады.

Бағдарламаның табысты жүзеге асуына үлес қосқан PAS Team құрамындағы 20 еріктіге, жоба жетекшілері Won Dae Hee, Lee Yongseok, Kim Dongeon мырзаларға, сондай-ақ қатысушыларға қолдау көрсеткен SDU University-дің 9 студент-амбассадорына алғысымызды білдіреміз.

SDU Extension Center халықаралық білім беру жобалары мен тілдік бағдарламаларды дамыту бағытында серіктестікті кеңейтуді жалғастырады және жаңа ынтымақтастық бастамаларына ашық.

Ынтымақтастық мәселелері бойынша байланыс телефоны: +7 775 595 22 15.

Астана қаласындағы Cardiff University Kazakhstan кампусында Бұқаралық ақпарат құралдары қызметкерлері күніне арналған салтанатты іс-шара өтті. Жиын барысында Қазақстан Республикасының Ғылым және жоғары білім министрі Саясат Нұрбек ғылым, жоғары білім және мемлекеттік тілді дамытуға үлес қосып жүрген БАҚ өкілдерін ведомстволық марапаттармен марапаттады.

Салтанатты рәсімде SDU University-дің «Медиа зерттеулер және журналистика» білім беру бағдарламасының 2-курс магистранты, «Ana tili» газетінің журналисі Бағдат Сұлтанқызы Қазақстан Республикасы Ғылым және жоғары білім министрлігінің «Ана тілін дамытуға қосқан үлесі үшін» ведомстволық төсбелгісіне ие болды.

Марапатты табыстаған министр Саясат Нұрбек журналистердің ғылым мен білімді қоғамға түсінікті тілде насихаттаудағы, жас ғалымдардың еңбегін танытудағы және мемлекеттік тілдің қолданыс аясын кеңейтудегі маңызды рөлін ерекше атап өтті.

Өз кезегінде Бағдат Сұлтанқызы бұл марапаттың өзі үшін зор мәртебе әрі үлкен жауапкершілік екенін айтып, ана тілін дамыту, білім мен ғылымды дәріптеу жолындағы еңбегін алдағы уақытта да жалғастыра беретінін жеткізді.

Қазіргі таңда жас зерттеуші SDU University-де медиа зерттеулер және журналистика бағыты бойынша ғылыми ізденісін жалғастыруда. Оның зерттеулері қазіргі қазақ медиасындағы қоғамдық маңызы бар тақырыптардың берілу ерекшеліктерін, ақпараттың фреймделуі мен медиадағы дискурстық үдерістерді талдауға бағытталған.

SDU University ұжымы Бағдат Сұлтанқызын жоғары марапатымен құттықтап, ғылым мен журналистика саласындағы шығармашылық және кәсіби қызметіне толағай табыс тілейді.

SDU Extension Center жоғары білім беру саласындағы оқытушылардың цифрлық құзыреттілігін дамытуға бағытталған «Білім берудегі жасанды интеллект: жалпы білім беретін пәндерді оқытуда AI-құралдарын практикалық қолдану» атты 80 сағаттық біліктілікті арттыру курсын сәтті аяқтады.

2026 жылғы 8–19 маусым аралығында гибридті форматта өткен бағдарламаға еліміздің жоғары оқу орындарынан 40 оқытушы қатысты. Курс аясында қатысушылар жасанды интеллект технологияларының білім беру үдерісіндегі мүмкіндіктерімен танысып, AI-құралдарын оқу материалдарын әзірлеуде, сабақтарды жоспарлауда және оқыту тиімділігін арттыруда тәжірибелік тұрғыда қолдану дағдыларын меңгерді.

Бағдарламаны компьютерлік ғылымдар магистрі, SDU University аға оқытушысы, SDU Technopark директоры және Kazakh Academy of Nutrition ғылыми қызметкері Эльнура Набигазинова жүргізді. Оқу барысында тыңдаушылар заманауи AI құралдарын тиімді пайдалану бойынша практикалық тапсырмалар орындап, оларды өздерінің кәсіби қызметіне енгізу жолдарын талқылады.

Бағдарламаның барлық талаптарын толық орындаған 34 қатысушыға жоғары оқу орындары оқытушыларының аттестациясына жарамды сертификаттар табысталды.

SDU Extension Center ұйымдар мен білім беру мекемелерінің қажеттіліктеріне сәйкес әзірленетін біліктілікті арттыру бағдарламаларын ұсынады. Орталық корпоративтік оқыту, кәсіби даму және бірлескен білім беру жобалары бойынша серіктестік орнатуға әрдайым ашық.

SDU University халықаралық Times Higher Education (THE) Impact Rankings 2026 рейтингінде өз нәтижесін жақсартып, әлемдік жоғары оқу орындары арасындағы позициясын нығайтты.

Биыл университет 58,5 жалпы ұпай жинап, әлемдік рейтингтің 801–1000 орындар тобына енді. Бұл өткен жылмен салыстырғанда елеулі өсім болып табылады: 2025 жылы SDU University 1001–1500 орындар диапазонында орналасқан болатын.

THE Impact Rankings рейтингі жоғары оқу орындарының Біріккен Ұлттар Ұйымының Тұрақты даму мақсаттарын (Sustainable Development Goals – SDGs) іске асыруға қосқан үлесін бағалайды. 2026 жылы SDU University 10 Тұрақты даму мақсаты бойынша бағаланды.

Университеттің негізгі көрсеткіштері төмендегідей:

• SDG 1 – No Poverty (Кедейлікті жою): 601–800
• SDG 3 – Good Health and Well-being (Денсаулық және әл–ауқат): 1001+
• SDG 4 – Quality Education (Сапалы білім): 601–800
• SDG 5 – Gender Equality (Гендерлік теңдік): 401–600
• SDG 8 – Decent Work and Economic Growth (Лайықты еңбек және экономикалық өсім): 601–800
• SDG 9 – Industry, Innovation and Infrastructure (Индустрия, инновациялар және инфрақұрылым): 601–800
• SDG 10 – Reduced Inequalities (Теңсіздікті азайту): 401–600
• SDG 11 – Sustainable Cities and Communities (Тұрақты қалалар мен қауымдастықтар): 601–800
• SDG 16 – Peace, Justice and Strong Institutions (Бейбітшілік, әділеттілік және тиімді институттар): 401–600
• SDG 17 – Partnerships for the Goals (Мақсаттар жолындағы серіктестік): 401–600

Аталған нәтиже SDU University-дің білім беру сапасын арттыру, әлеуметтік жауапкершілікті дамыту, ғылыми зерттеулерді қолдау және тұрақты даму қағидаттарын университет қызметіне жүйелі енгізу бағытындағы жұмыстарының тиімділігін көрсетеді.